Arsenal Yamuritse Umwambaro Mushya Wo Mu Rugo Izambara Mu Mwaka Utaha W’imikino.

Uyu mwambaro mushya washyizwe hanze kuri uyu wa Gatanu, tariki ya 26 Gicurasi 2023, uzajya wambarwa n’ikipe ya mbere y’abagabo, iy’abagore n’iz’abato.

Ni umwambaro w’umutuku ufite amaboko y’umweru n’imirongo itatu y’ibara rya zahabu ku bitugu, ufite ikirango cya Visit Rwanda ku kuboko kw’ibumoso mu ibara rya zahabu ndetse uzajya ujyana n’amakabutura y’umweru n’amasogisi y’umweru.

Uyu mwambaro wakozwe mu rwego rwo kwizihiza imyaka 20 iyi kipe izaba imaze itwaye Igikombe cya Shampiyona idatsinzwe mu 2004 ‘The Invincibles’.

Imirongo imanutse ku ntugu ndetse n’ikirango cya Adidas biri mu ibara rya zahabu, bisobanura imikino 26 iyi kipe yatsinze ndetse na 12 yanganyije muri uwo mwaka yatwayemo igikombe idatsinzwe.

Rutahizamu Bukayo Saka yabwiye urubuga rwa Arsenal ko afite amatsiko mbere yo kwibona yambaye uyu mwambaro mu kubuga.

Yagize ati “Kwishimira ibi bihe turi hamwe ni byo bituma twumva dutindiwe no kuzambara uyu mwambaro. Bidutera imbaraga iyo tuzi ko abakinnyi, abafana n’inshuti twese turi hamwe kuko ni byo bitugira abakomeye.”

Uyu mwambaro uzambarwa bwa mbere n’Ikipe y’Abagore ku wa Gatandatu mu mukino wa nyuma wa shampiyona izahuramo na Aston Villa.

Ikipe y’Abagabo izawambara bwa mbere mu mukino wa nyuma wa Shampiyona izakiramo Wolverhampton Wanderers ku Cyumweru saa 17:30.

Arsenal yamuritse umwambaro mushya wo mu rugo izambara mu mwaka utaha w’imikino wa 2023/24

Bukayo Saka uherutse kongera amasezerano yavuze ko iminsi imutindiye ngo yambare uyu mwambaro mushya

Abanya-Brésil bakinira Arsenal bambaye umwambaro mushya

Ni umwambaro wakozwe mu rwego rwo kwizihiza imyaka 20 ishize Arsenal yegukanye Igikombe cya Premier League idatsinzwe

Rutahizamu Gabriel Jesus mu mwambaro mushya

Steph Catley ukinira Arsenal y’Abagore

Myugariro Leah Williamson ukinira Arsenal y’Abagore mu mwambaro mushya

Bamwe mu bakinnyi b’Ikipe y’Abagore mu mwambaro mushya wo mu rugo