Umukinnyi wo hagati wa Newcastle n’Ikipe y’Igihugu y’u Butaliyani, Sandro Tonali, yahagaritswe amezi 10 kubera kurenga ku mategeko yo gutega ku mikino.
Iki cyemezo cyafashwe n’Ishyirahamwe ry’Umupira w’Amaguru mu Butaliyani (FIGC) ndetse Tonali azongera gukina muri Kanama 2024.
Ibi bivuze ko uyu mukinnyi w’imyaka 23 atazakina Igikombe cy’u Burayi mu 2024 mu gihe u Butaliyani bwaba bubonye itike.
Tonali yagiye muri Newcastle United muri Nyakanga, aguzwe miliyoni 55£ muri Milan AC.
Ibihano yahawe byaje bikurikiwe ibiheruka guhabwa mugenzi we, Nicolo Fagioli ukinira Juventus, we wahagaritswe amezi arindwi na FIGC kubera gutega ku mikino.
Aba bakinnyi bombi bavuye mu mwiherero w’Ikipe y’Igihugu y’u Butaliyani ku wa 12 Ukwakira, nyuma yo kubwirwa ko bari gukorwaho iperereza n’ubushinjacyaha.
Mu gihe cy’imyaka itatu yamaze i San Siro, Tonali yafashije Milan AC kwegukana Igikombe cya Shampiyona y’u Butaliyani mu mwaka w’imikino wa 2021/22 no kugera muri ½ cya UEFA Champions League.
Yagiye mu kibuga asimbuye ku mukino wa Champions League, Newcastle United yatsinzwemo na Borussia Dortmund igitego 1-0 ku wa Gatatu.
Tonali yari amaze gukina imikino 12 muri Newcastle United kuva abaye umukinnyi uhenze mu mateka yayo.
Newcastle iri ku mwanya wa gatandatu muri Premier League, izasura Wolves ku wa Gatandatu mbere yo guhura na Manchester United muri Carabao Cup.
