Emmerson Mnangagwa Yatorewe Manda Ya 2 Yo Kuyobora Zimbabwe
Emmerson Mnangagwa yatorewe manda ya kabiri yo kuyobora Zimbabwe mu gihe cy’imyaka itanu iri imbere, nyuma yo gutsinda abakandida bari bahanganye mu matora yabaye muri iki Cyumweru.
Mnangagwa w’imyaka 80 yatowe ku majwi 52.6% nkuko amajwi yashyizwe hanze na Komisiyo y’Amatora abigaragaza. Ni mu gihe Nelson Chamisa utavuga rumwe n’ubutegetsi yabonye amajwi 44%.
Abatavuga rumwe na Leta bahise bamagana ibyatangajwe na Komisiyo y’amatora, bavuga ko batemera Mnangagwa nka Perezida.
Amatora yo muri Zimbabwe yari ahanzwe amaso ku rwego mpuzamahanga kubera imvururu zakunze kurangwa mu matora ya Perezida. Ni mu gihe kandi hari hashize iminsi havugwa kwibasirwa kw’abashyigikiye Chamisa.
Ubusanzwe amatora yari ateganyijwe kuba kuwa Gatatu w’iki cyumweru ariko hongeweho iminsi ibiri kugira ngo haboneka impapuro zihagije z’itora.
Ishyaka ZANU PF rya Mnangagwa ni naryo rifite ubwiganze mu Nteko Ishinga Amategeko nyuma yo gutorwa n’abasaga miliyoni 2.3 mu gihe irya Chamisa ryatowe n’abasaga miliyoni 1.9.
Mnangagwa uzwi ku kabyiniriro k’ingona, yahoze ari Visi Perezida wa Zimbabwe kubwa Perezida Robert Mugabe, gusa aza kumuhirika ku butegetsi mu 2017 nyuma yo kutumvikana. Mu 2018 nibwo Mnangagwa yatorewe manda ya mbere.
