Musanze: Urubyiruko rw’abakorerabushake rwateye ibiti bisaga 1000
Urubyiruko rw’Abakorerabushake mu Karere ka Musanze rukomeje ibikorwa byo kubungabunga ibidukikije rutera ibiti 1000 mu kubungabunga ibidukikije ndetse n’ibindi bikorwa bigamije imibereho myiza y’abaturage.
Urwo rubyiruko rwavuze ko mu Kwezi kwahariwe ibikorwa by’urubyiruko rw’Abakorerabushake (Youth Volunteers) biyemeje kurwanya isuri batera ibiti. Uretse Ibyo biti bakomeje n’ibikorwa bihindura imibereho myiza y’Abaturage bishingiye ku bikorwa byateganyijwe.
Ubahagarariye Robert Byiringiro yagize ati: “Uku kwezi kwahariwe ibikorwa by’urubyiruko rw’abakorerabushake, twiyemeje gutera ibiti turwanya isuri kandiu tuzanakomeza ibindi bikorwa bigamije imibereho y’abaturage”.
Bafatanyije na Polisi y’u Rwanda bakoze umuganda wo gutera ibiti mu Murenge wa Muhoza, Umudugudu wa Nduruma Akagali ka Kigombe mu rwego rwo kubungabunga umugezi wa kigombe. Ni umuganda wakozwe haterwa ibiti bisaga 1000.
Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza ari kumwe n’umuyobozi wa Polisi mu Karere ka Musanze SP Elvis Munyaneza hamwe n’Ubuyobozi bw’Akarere bifatanyije n’urubyiruko rw’abakorerabushake babashimiye ku gikorwa bakoranye cyo kubungabunga ibidukikije.
Mu Karere ka Musanze ubwo basozaga ibikorwa byo gutera ibiti biyemeje gukomeza kurwanya isuri bakumira ibiza, guca imirwanyasuri no kwibutsa Abaturage kuzirika ibisenge by’inzu.
Umuganda wo gutera ibiti witabiriwe n’urubyiruko rw’abakorerabushake mu Murenge wa Muhoza bari kumwe na Komite yarwo ku rwego rw’Akarere ka Musanze. Umuhuzabikorwa w’Urubyiruko rw’Abakorerabushake ku rwego rw’akarere Robert Byiringiro yashimiye urubyiruko rwitabiriye iki gikorwa.
Ubuyobozi bw’ikigo gishinzwe amashyamba buvuga ko mu gihe cy’umwaka hazaba hatewe miliyoni 63 z’ibiti kugira ngo hongerwe ingano y’ibiti bifata ubutaka, ibivangwa n’imyaka ndetse n’ibiribwa.
