Menya byinshi kuri Copilot+ PCs, mudasobwa zikoresha AI zigiye gushyirwa ku isoko na Microsoft
Ikigo cyashinzwe n’umuherwe Bill Gate kizwi mu ruhando rw’ikoranabuhanga, Microsoft, kiri mu mushinga wo gushyira ku isoko mudasobwa zikoresha ubwenge bukorano (Artificial Intelligence, AI), ibintu byitezweho kuzongerera ububasha imikorere ya Windows zazo.
Izo mudasobwa zahawe izina rya Copilot+ PCs, zizaba zifitemo ikoranabuhanga rya AI ryiswe ‘Recall’ rituma zibasha kugarura ibintu byakorewe kuri iyo mudasobwa mu bihe byahise.
Vuba aha, iryo koranabuhanga rizaba ryatangiye gushyirwa muri Windows 11.
Microsoft isobanura ko Copilot+ PCs ari zo mudasobwa zihuta cyane ndetse zikoranye ubuhanga buhanitse za mbere zikozwe.
Zifite ububasha bwo gukora ibikorwa tiliyoni mu isegonda rimwe, batiri zazo zikamara umunsi wose zidasubijwe ku mashanyarazi, ndetse zibasha gukorana n’ibindi bikoresho byifashisha AI.
Ibyo bituma hemezwa ko Copilot+ PCs zizashoboza abazifite gukora ibintu izindi mudasobwa izo ari zo zose zitabasha.
Ukoresha Copilot+ PC azabasha gusubiza ibihe inyuma arebe ibintu yakoreye kuri mudasobwa ye mu gihe cyahise akoresheje ‘Recall’.
Azabasha kandi kurema no gutunganya neza amashusho ya AI mu buryo bumworoheye cyane kandi bwihuse, akoresheje ikoranabuhanga rya ‘Cocreator’ ryashyizwemo.
Copilot+ PCs zizanafasha abazikoresha guhangana n’imbogamizi z’ururimi, aho zizajya zishyira ‘captions’ ku mashusho ako kanya (live), zigasemura amajwi yo mu ndimi zirenga 40 ziyashyira mu Cyongereza.
Ku kijyanye n’ingano yazo, ni mudasobwa zizaba ari ntoya, zitwaritse mu buryo bworoshye.
Biteganyijwe ko zizatangira kugera ku isoko ku wa 18 Kamena 2024, ndetse ibigo by’ikoranabuhanga bisanzwe bikorana na Microsoft birimo Acer, ASUS, Dell, HP, Lenovo na Samsung byose bikazaba bizifite.
Igiciro cyazo ntikiremezwa neza, ariko hagaragazwa ko kizahera nibura ku $999.
Microsoft isanzwe ifite ikoranabuhanga rya AI yise Copilot, rimaze igihe kirenga umwaka ryifashishwa.
