Karim Benzema Yasezeye Mu Ikipe Ya Real Madrid.
Real Madrid CF yo muri Espagne yemeje ko rutahizamu wayo Karim Benzema w’imyaka 35 agiye kuyivamo, nyuma y’imyaka 14 yari amaze ayikira.
Ni ikipe yubakiyemo izina rikomeye nyuma yo kuyigeramo mu 2009 aturutse muri Lyon yo mu Bufaransa, icyo gihe yari afite imyaka 21.
Mu itangazo iyi ku ipe yasohoye, yavuze ko kapiteni wayo yahisemo gusoza igihe cye nk’umukinnyi wayo.
Yakomeje iti “Real Madrid yifuje kumushimuira no kumugaragariza urukundo nk’umwe mu banyabigwi bacu.”
Kuva yagera muri Real Madrid, Benzema yatwaye ibikombe 25 birimo bitanu bya UEFA Champions League, bitanu by’isi, 4 bya European Super Cups, 4 bya shampiyona, 3 bya Copa del Rey na 4 bya Spanish Super Cup.
Asezeye muri iyi kipe nyuma yo kwegukana Ballon d’Or no gutorwa nk’umukinnyi wa UEFA w’umwaka, mu mwaka ushize wa 2022.
Karim Benzema yari ageze ku mwanya wa gatanu mu bakinyiye Real Madrid imikino myinshi (647), akaza no ku mwanya wa kabiri mu bayitsindiye ibitego byinshi (353), inyuma ya Cristiano Ronaldo watsinze 450.
Biteganyijwe ko ibirori byo kumusezeraho mu cyubahiro bizaba ku wa Kabiri tariki 6 Kamena.
Muri uyu mwaka w’imikino, Benzema yakinnye imikimo 42 mu marushanwa yose, atsindamo ibitego 30, anatanga imipira yavuyemo ibitego bitandatu.
Bivugwa ko ashobora gusimburwa muri Real Madrid na Harry Kane ukinira Tottenham Hotspur FC yo mu Bwongereza.
Byitezwe ko Benzema ashobora kwerekeza muri Al Ittihad yo muri Arabie Saoudite.
