Umukuru w’ihuriro rya politike na gisirikare ritavuga rumwe n’ubutegetsi bwa Kinshasa riherutse gushingwa i Nairobi muri Kenya yasohoye itangazo rye rya mbere risinyeho ko aherereye i Rutshuru mu ntara ya Kivu ya Ruguru, risaba rubanda kuryiyungaho bagakuraho “byihutirwa” Perezida Felix Tshisekedi.
Mu itangazo ryerekanwe na Bertrand Bisimwa wa M23, Corneille Nanga wari uyoboye komisiyo y’amatora ya DR Congo mu matora ya perezida ya 2018 yahaye intsinzi Tshisekedi, yamaganye amatora aheruka.
Agira ati: “Alliance Fleuve Congo yifatanyije n’abandi bakandida na rubanda rurimo kureba byendagusetsa y’imibare…irimo kwerekanwa nk’ibyavuye mu matora maremare yibwe… hagamijwe guha intsinzi Tshilombo” Tshisekedi.
Mu itangazo rye, Corneilla Nangaa yavuze ko ihuriro Alliance Fleuve Congo (AFC) intego yaryo ari ukuvanaho Tshisekedi, ko rizakoresha “uburyo bwose bushoboka mu gusubizaho demokarasi isanzwe na repubulika igendera ku mategeko”.
Avuga ko AFC “itazakangwa cyangwa ngo isubizwe inyuma n’ibikangisho” bya Tshisekedi kugira ngo igere kuri iyo ntego.
