Benjamin Mendy agiye kurega Manchester City
Umufaransa Benjamin Mendy yiteguye kujyana mu nkiko ikipe ya Manchester City yahoze akinira kubera ko hari miliyoni nyinshi yakaswe ku mishahara ye atabimenyeshejwe.
Myugariro Benjamin Mendy w’imyaka 29 yasoje amasezerano ye mu mpeshyi iheruka ndetse ahita yerekeza muri Lorient yo mu Bufaransa akinira kugeza ubu.
Muri Nyakanga 2023 ni bwo uyu mugabo yagizwe umwere ku byaha byo gufata ku ngufu no kugambirira gufata ku ngufu yari akurikiranyweho kuva mu 2020, ashinjwa ko yabikoze mu 2018.
Bivugwa ko kuva muri Nzeri 2021 ubwo iperereza ryari ririmbanyije ku byaha yaregwaga Manchester City yahagaritse kumuha imishahara ye yahembwaga kuko yari mu nkiko.
Umunyamategeko mu bya Siporo mu Bwongereza, Nick De Marco, yaciye amarenga ko azagira uruhare mu gukurikirana Manchester City ku birego yarezwe na Mendy asaba ko yahabwa miliyoni nyinshi.Biteganyijwe ko azatangira urubanza muri Mutarama 2024.
Ikinyamakuru cya BBC dukesha iyi nkuru cyagerageje kwegera uruhande rwa Manchester City kugira ngo rugire icyo ruvuga kuri ibyo birego ntiyagira icyo itangaza kuri uyu mukinnyi uheruka kuyikinira tariki ya 15 Kanama 2021.
Mu mezi agera kuri atanu Mendy amaze muri Lorient yakinnye imikino itatu gusa kandi nabwo agiye mu kibuga asimbuye.
Uyu mukinnyi yageze muri Manchester City avuye muri Monaco, aguzwe miliyoni 52£. Yafatanyije n abagenzi be kwegukana ibikombe bya Shampiyona ya Premier League bya 2018, 2019 na 2021.
Andi makipe yakiniye harimo Le Havre, Marseille ndetse n’andi yose y’Ikipe y’Igihugu guhera mu z’abana bakiri bato.
