Gabon: Abatavuga Rumwe n’Ubutegetsi Basabye Igisirikare Gusubiramo Amajwi y’Amatora
Abatavuga rumwe n’ubutegetsi muri Gabon bagaragaje ko bishimiye ihirikwa ku butegetsi rya Perezida Ali Bongo, basaba abasirikare bafashe ubutegetsi gusubukura ibarura ry’amajwi kuko bishobora kugaragaza undi wayatsinze utari Bongo.
Perezida Ali Bongo yahiritswe ku butegetsi tariki 30 Kanama 2023, nyuma y’amasaha make komisiyo y’amatora itangaje ko yayatsinze agize amajwi 64.27%, mu gihe umukandida uhagarariye abatavuga rumwe n’ubutegetsi, Ondo Ossa we yagize 30.77%.
Abatavuga rumwe n’ubutegetsi bafite icyizere ko mu gihe amajwi yasubirwamo, ibizavamo bizageza umukandida wabo Ondo Ossa ku ntsinzi, akaba umukuru w’igihugu.
Ni mu gihe ingabo ziyobowe na Gen Brice Oligui Nguema zigifata ubutegetsi zahise zitesha agaciro ibyavuye mu matora, ndetse inzego z’ubuyobozi za leta zose ziraseswa.
Biteganyijwe ko Gen Oligui Nguema akomeza kuyobora igihugu muri manda y’inzibacyuho, ariko ntibigeze batangaza igihe izamara.
Africanews yanditse ko abatavuga rumwe n’ubutegetsi banasabye abasirikare bafashe ubutegetsi kwitabira biganiro bigamije kurebera hamwe inzira igihugu gikwiye kuyoborwamo kugira ngo cyikure mu bibazo, gitere imbere.
